Haut op vun 08h00 -14h00 (ouni Ënnerbriechung)
E Bléck op déi aktuell Projeten an der Gemeng Nidderaanwen
An der Sëtzung vum Gemengerot vum 14. November 2025 ass de Projet vun der Konversioun vum Grasterrain vum Stade Jos Becker zu engem syntheeteschen Terrain gestëmmt ginn. Nodeem s analyséiert gouf, wéi eng Zort Terrain am Stade Jos Becker am sënnvollsten ass, ass d’Wiel op ee syntheeteschen Terrain gefall. Dëst erméiglecht eng aachtmol sou héich Notzungszäit. Soumat kënnen an Zukunft niewent de Matcher vun de Senioren och Jugendmatcher an eng Villzuel un Trainingen ofgehale ginn. Fir den Afloss op d’Ëmwelt geréng ze halen, huet d’Gemeng Nidderaanwen sech fir een onverfëllte syntheeteschen Terrain entscheet.
Während der Sitzung vum Gemengerot den 26. Juni 2025 gouf de Projet fir d’Verleeë vun enger Reewaasserleitung am Beräich vum Gemengenhaus gestëmmt.
De Projet gesäit d’Verleeë vun enger neier Stahlbetonkanalisatioun iwwer eng Längt vun 310 Meter vir, déi bei der Rue d’Ernster ufänkt, iwwer d’Réckhaltebecken „PAP Schommeschwues“ bis bei den Iwwerlaf an d'Bach „Bouneschbaach“, déi hannert dem Gebai vun der Gemeng verleeft.
Dës nei Kanalisatioun erméiglecht d’Ofleede vum Reewaasser aus der Rue d’Ernster souwéi aus verschiddene méi neie Projeten an der Géigend (PAP Cité Wakelter, PAP Um Wakelter, PAP Op Pelgert) an och vum Reewaasser aus dem PAP Schommeschwues.
Zousätzlech sinn Upassungsaarbechten um Iwwerlaf virgesinn, fir dësen un déi nei Kanalisatioun unzeschléissen. Ausserdeem ass e Betonbauwierk geplangt, fir d’bestoend Mëschwaasserleitung hannert dem PAP Schommeschwues ze kräizen.
De Projet ëmfaasst och d’Restauratioun vun der Infrastruktur tëscht der Récksäit vum PAP Schommeschwues an dem Iwwerlaf.
D’Bauaarbechten gi parallel zum Baufortschrëtt vum PAP NQ Schommeschwues ugefaangen. De Start vun de Bauaarbechten ass fir Enn 2025 virgesinn.
Wärend senger Sëtzung vum 26. September 2025 huet de Gemengerot vun der Gemeng Nidderaanwen de Projet fir d’Renovatioun vum Kulturzentrum « Loisi » ugeholl. Dëse Projet ass geduecht fir den ëmmer méi grousse Besoine vun der Bevëlkerung am Beräich Kultur, Sport a Gesellegkeet gerecht ze ginn.
Fir weider Informatiounen, konsultéiert w.e.g. de Pressecommuniqué hei drënner.
An der Sëtzung vum 27. Juni 2025 huet de Gemengerot eestëmmeg de Bauprojet vun enger neier Crèche um Sennengerbierg gestëmmt. D',,Bëschcrèche'' soll beim Bësch, nieft dem Scout's Home, entstoen a wäert Plaz fir ronn 60 Kanner bidden. Am Kader vum Projet sinn och Dortoirë fir bis zu 30 Scoute virgesinn. De Start vum Projet ass fir 2026 geplangt. D'Fäerdegstellung vum Projet, sou wéi d'Mise en service vun der Crèche si fir 2029 virgesinn.
An der Gemengerotssëtzung vum 25. Oktober 2024 gouf iwwert de Projet vun engem méiglechen ,,Energiepark Niederanven'' diskutéiert.
Den 2. Juli 2025 gouf an Zesummenaarbecht mat Soler eng Informatiounsversammlung fir d'Awunner vun der Gemeng Nidderaanwen organiséiert. Weider Informatiounen iwwert de Projet, sou wéi d'Präsentatioun vun der Infoversammlung fannt Dir hei drënner.
An der Gemengerotssëtzung vum 21. Mäerz 2025 gouf de Projet vun der Realisatioun vun engem bed&bike am ale Waassertuerm um Sennengerbierg gestëmmt. De Projet ziilt op d'Renovatioun a Reaffektatioun vum eemolege Waassertuerm am Binnewee, dëst a Form vun enger touristescher Herberg am bed&bike Format.
An der Gemengerotssëtzung vum 21. Mäerz 2025 gouf de Projet vun de virbereedenden Aarbechte fir d'Renovatioun an d'Extensioun vum Cycle 1 vun der Schoul ,,Am Sand'' gestëmmt. Méi Informatioune fannt Dir an der Presentatioun hei drënner.
Um Senningerbierg gëtt en neien Waasserbaseng gebaut fir Versuergung vum Flughafen an deenen neie Projeten am Ëmfeld ze garantéieren. De Baseng huet e Volume vun 2400m3 a kritt e begréngten Daach fir sech an d'Landschaft anzepassen a méi nohalteg ze sinn. De Bau vum Basseng huet ugefaangen a soll gutt zwee Joer daueren.
An der Gemengerotssëtzung vum 17. Januar 2025 gouf de Projet vun der Mise en conformité vun dem Busarrêt “Charly’s Station” an der Rue du Golf um Sennengerbierg geneemegt. Duerch d’Mise en conformité wäerten an Zukunft Persoune mat ageschränkter Mobilitéit besser de Bus op dëser Plaz notze kënnen.
An der Gemengerotssëtzung vum 17. Januar 2025 gouf de Projet vun der Securisatioun vum Zebrasträifen op der Route de Trèves um Sennengerbierg geneemegt. Beim Zebrasträifen handelt et sech ëm dee bei der Kräizung vun der N1 mat der Rue du bois an der Rue de Neuhausgen. Fir d'Sécherheet op dëser Plaz ze verbessere gëtt den Zebrasträife mat enger rouder Luucht geséchert.
An der Gemengerotssëtzung vum 29. Mäerz 2024 gouf de Projet vum Reamenagement vun der Rue des Romains an d'Baue vun enger Vëlospiste geneemegt. Bei dësem Projet gëtt iwwert eng Längt vu 475 Meter eng Vëlospiste gebaut an tëschent de Kräizunge Rue des Romains / Rue des Sapins a Rue des Romains / Rue des Pins d'Strooss an den Trottoir fir eng 30er-Zon ugepasst. Doriwwer eraus gëtt de Busarrêt an der Rue des Romains konform gesat an en Trottoir traversant an der Entrée zu der Rue des Pins amenagéiert.
Hei e puer aktuell Projeten, déi zur Sécherheet an d'Berouegung vum Trafic an der Gemeng bäidroen:
- Reamenagement vun der Rue du Château zu Senneng - Entrée an eng 30er Zon
- Zebrasträifen an der Rue de Munsbach zu Nidderaanwen
- Reamenagement vum Busarrêt ''Schetzel'' zu Ueweraanwen
- Amenagement vun engem Trottoir an der Rue Principale zu Hueschtert
En Vue vun der Neigestaltung vun der Duerfplaz zu Iernster, goufen den 18. Mee 2022 an den 19. Oktober 2022 wärend zwee Workshoppen zesumme mat de Bierger, Iddie fir en neien Duerfkär zu Iernster gesammelt. D'Resultater vun dëse Workshoppe goufen de Bierger elo den 8. Mäerz 2023 wärend engem Informatiounsowend presentéiert.
Wärend senger Sëtzung vum 26. September 2025 huet de Gemengerot vun der Gemeng Nidderaanwen gréng Luucht gi fir de Reamenagement vum Duerfkär zu Iernster, kombinéiert mat der Aféierung vun enger Vitesslimitt vun 30 km/h an der Rue Principale (CR132) am Duerfzentrum an der Sécherung vun den Duerfentréen.
Wärend dem Gemengerot vum 24. Februar 2023 gouf de Projet vun der Renovatioun an dem Ausbau vum Stade Jos Becker gestëmmt. Beim Projet ass eng Transformatioun vum bestoende Gebai an eng Extensioun geplangt, mam Zil d'Raimlechkeeten an Zukunft besser notzen ze kënnen a méi Fläch zur Verfügung ze hunn. Wat den Ausbau vum Stade betrëfft, sinn hei virun Allem d'Vestiairen an d'Tribün betraff, déi renovéiert an ausgebaut ginn.
Technesch gesinn, gëtt d'Gebai moderniséiert fir op den aktuelle Stand ze kommen. D'Gasheizung gëtt duerch eng Loftwärmepompel ersat, déi am südlechen Deel vum Spillfeld positionéiert gëtt. Eng moderniséiert Lëftungsanlag gëtt an engem Technikraum iwwert der Pressekabinn placéiert. Eng nei Reewaasserzëttär wäert fir d'Bewässerung déngen. Op den Diecher ass eng Photovoltaikanlag virgesinn.
En neien a wichtege Projet ass den 9. Dezember 2022 am Gemengerot gestëmmt ginn. Riets ass vun engem Centre medical beim ale Policegebai zu Ueweraanwen. Hei wäerte sech viraussiichtlech ab 2026 an der Rue Andethana eng Rei Dokteren, souwuel Generalisten ewéi och Spezialisten nidderloosse kënnen.
Wärend dem Gemengerot vum 1. Abrëll 2022 gouf de Projet vum Haff Peter an der Rue Laach gestëmmt. Nieft der Realisatioun vu Seniorewunnengen a bezuelbarem Wunnraum, soll hei och Café littéraire an e Gemeinschaftszentrum am Agang vum neie Quartier entstoen, wou Kënschtler, Start-ups a lokal Veräiner (Club50Plus & Club Senior) ënnerbruecht kënne ginn.
